Tsab ntawv

Luvtawlees Txojkev Ntseeg Nyob Africa

Hais Tshwjxeeb Txog Lutheran Church of Central Africa Zambia Synod (LCCA-Z)

Los ntawm Xibfwb Anthony Phiri

Lus Qhia Ua Ntej

Africa yog lub cheebtsam ntiajteb uas loj thib ob hauv ntiajteb, muaj 54 lub tebchaws uas luag lees paub. Nws muaj thaj chaw thiab tej kevcai coj sib txawv ntau kawg, thiab muaj kwvyees li 1.5 billion leej neeg. Niajhnub no txojkev ntseeg Yexus yog txojkev ntseeg uas loj hlob sai tshajplaws nyobrau Africa Sab Qab Saharas, loj hlob sai dua Islam thiab. Lub cheebtsam ntiajteb no muaj cov ntseeg Yexus uas hluas, uas muaj zog, thiab uas muaj lub siab kub, thiab lawv tabtom los ua cov thawjcoj rau cov ntseeg thoob ntiajteb ntau zuj zus.

Cov neeg Africa yeej ntseeg thiab pehawm Vajtswv ua tus uas Loj Tshajplaws txij thaum ub los lawm. Txawm tej haivneeg thiab tej kevcai coj sib txawv hu Vajtswv ua ntau lub npe los, tej yam uas lawv hais txog Nws—muaj hwjchim loj kawg nkaus, nyob txhua qhov chaw, thiab paub txhua yam—yeej tsis hloov li. Txojkev paub Yexus Khetos twb tuaj txog Africa thaum tiam ntawm cov Tubtxib lawm, xws li los ntawm cov neeg Africa uas tuaj koom Tsiab Peetekos thiab tus nom neeg Ethiopia hauv Teshaujlwm 8. Txawm li ntawd los, nyobrau ntau qhov hauv Africa Sab Qab Saharas, txojkev ntseeg Yexus mam li nthuav dav tomqab thaum cov tubtxib mus tshaj txoj moo zoo sab Hnubpoob tuaj txog thiab tshaj txoj moo zoo.

Rau cov Luvtawlees nyob Africa, Kev Txhimkho Kevntseeg cov lus yog ib qho uas rov nrhiav tau txoj moo zoo lub ntsiab tseemceeb dua. Sola Fide—kev ntseeg xwb—thiab Solus Christus—Khetos tib leeg xwb—qhia hais tias txoj kev cawmdim yog txais los ntawm kev ntseeg Yexus Khetos (Lukas 7:48-50). Cov lus no lub ntsiab yog qhov uas Vajtswv suav tus neeg txhaum ua neeg ncajncees los ntawm Nws txojkev hlub uas tsis muaj yam twg thaiv thiab Nws txiaj ntsim uas peb tsis tsimnyog tau. Lo lus uas hais tias “Txoj kev cawmdim tsis yog yam muag” nkag mus rau hauv cov neeg Africa lub siab tob heev. Luvtawlees tej lus qhia hais tseemceeb txog qhov tseeb no: txoj moo zoo tsis yog hais txog kev ncajncees uas Vajtswv yuav ntawm peb, tiamsis yog kev ncajncees uas Vajtswv muab pub rau peb. Peb dim los ntawm Sola Gratia—txiaj ntsim xwb (Efexaus 2:8).

Thaum hais tseemceeb txog txiaj ntsim xwb, Luvtawlees tej lus qhia qhia hais tias Vajtswv yog tus xub ua ua ntej tibneeg teb dabtsi, thiab Nws kuj yog tus tshoov kom tibneeg teb los ntawm txoj moo zoo. Lub meej mom yog Vajtswv tib leeg li—Soli Deo Gloria. Vajtswv lub meej mom yog txoj kev cawmdim lub homphiaj tseemceeb. Txawm qhov uas tibneeg lub neej zoo tuaj ntawd yog ib qho koob hmoov los, qhov ntawd tsis yog lub homphiaj loj. Vajtswv tsis yog ib txojkev xwb los ua kom tau ib yam dabtsi; Nws yog txojkev thiab yog qhov kawg tibsi.

Luvtawlees txojkev ntseeg pib xyoo 1517 thaum Matees Luvtaws luam tawm nws 95 Nqe Lus, uas yog ib tsab ntawv tawm tsam qhov uas pawg Katauliv muag tej ntawv zam txim (indulgences) thiab siv pawgntseeg lub hwjchim tsis raug cai. Qhov no thiaj ua rau muaj Kev Txhimkho Kevntseeg. Luvtaws tej lus qhia raug muab sau ua ke rau hauv phau ntawv Khaukawm (Book of Concord), uas niajhnub no tseem yog tus qauv rau cov pawgntseeg Luvtawlees thoob ntiajteb tej lus qhia thiab tej lus lees kev ntseeg.

Peb maj nrawm ntawm Wittenberg, tebchaws Yelamas, Kaum Hli Tim 31, 1517, mus rau Lusaka, tebchaws Zambia, xyoo 1949, vim tsab ntawv no tsis npaj yuav piav txog cov Luvtawlees tes haujlwm yav thaum ub thoob plaws Africa. Hloov chaw, nws saib ntsoov rau keebkwm, tej lus qhia, tej kevcoj kev pehawm Vajtswv, thiab qhov kev loj hlob ntawm Lutheran Church of Central Africa nyob Zambia, nyobrau hauv cov ntseeg Yexus hauv Africa lub ntsiab dav. Nws kuj saib txog cov thawjcoj uas yog neeg hauv tebchaws thiab kev kawm ntawv qhov uas txhawb pawgntseeg kom nyob mus, thiab hais txog tej teebmeem uas cov Luvtawlees ntsib nyobrau tiam 21.

Raws li Luvtawlees tej lus qhia, txoj kev dim ntawm kev txhaum yog txais tau los ntawm Vajtswv txiaj ntsim uas peb tsis tsimnyog tau xwb (Sola Gratia), txais tau los ntawm kev ntseeg xwb (Sola Fide), thiab muab Vajtswv Txojlus xwb los ua tus qauv (Sola Scriptura). Luvtawlees tej lus qhia kuj lees hais tias thaum chivkeeb Vajtswv tsim lub ntiajteb thiab tibneeg zoo tagnrho, dawbhuv, thiab tsis muaj kev txhaum.

Lutheran Church of Central Africa (LCCA) yog ib pab ntseeg Yexus nyobrau hauv Luvtawlees kev ntseeg. Nws tes haujlwm nyob ntau tshaj rau Zambia thiab Malawi. LCCA-Z muaj 115 lub pawgntseeg. Luag kwvyees hais tias muaj 8,885 tus uas koom Pluahmo Dawbhuv. Tagnrho cov uas twb ua npavtivxamas lawm hauv LCCA-Z tejzaum muaj li 10,000 leej. LCCA hais tseemceeb txog txoj kev cawmdim los ntawm txiaj ntsim xwb dhau ntawm kev ntseeg xwb, thiab tuav Phau Vajtswv Txojlus ua tus muaj hwjchim siab tshajplaws thiab tsis muaj yuamkev rau cov ntseeg lub neej thiab tej lus qhia.

LCCA Keebkwm

Luvtawlees txojkev ntseeg keebkwm thiab nws qhov tshwm sim niajhnub no nyob Zambia hais tshwjxeeb txog Lutheran Church of Central Africa (LCCA) tus yamntxwv ntawm kev ntseeg, nws txojkev teeb tsa, thiab nws tes haujlwm.

Lutheran Church of Central Africa raug tsim tsa los ntawm cov tubtxib Luvtawlees uas tuaj ntawm Wisconsin Evangelical Lutheran Synod tuaj. Tes haujlwm tshawb xyuas pib xyoo 1949, thiab thawj cov tubtxib uas tuaj nyob ruaj tuaj txog xyoo 1953 nyobrau tebchaws Askiv thaj av Northern Rhodesia, uas tomqab los ua lub tebchaws Zambia. Xyoo 1955, luag teeb tsa ib pab ntseeg uas muaj npe hu ua Rhodesian Lutheran Church Conference. Xyoo 1962, Rhodesian Lutheran Church Conference raug muab teeb tsa dua thiab los ua Lutheran Church of Central Africa (LCCA).

Tomqab xyoo 1962, LCCA pib tes haujlwm tshawb xyuas nyobrau lub tebchaws Malawi uas nyob ze, uas coj mus tsim tau Malawi Conference ntawm LCCA. LCCA-Z muaj tej pawgntseeg nyobrau ntau lub xeev hauv Zambia thiab txuas ntxiv nws tes haujlwm los ntawm tej pawgntseeg, cov xibfwb, cov tshaj txoj moo zoo, thiab cov thawjcoj uas tsis yog xibfwb hauv Zambia.

Luvtawlees tej lus qhia uas muaj kev sib raug zoo hauv kev ntseeg tseeb nrog WELS kuj raug muab qhia rau lwm lub tebchaws hauv Africa, xws li Nigeria, Cameroon, Ethiopia, Uganda, Kenya, Tanzania, thiab Democratic Republic of Congo (DRC). Los ntawm One Africa Team (OAT), WELS txhawb kev kawm Vajtswv Txojlus thiab kev tshaj txoj moo zoo raws Luvtawlees kev ntseeg tseeb, ua haujlwm ua ke nrog cov thawjcoj pawgntseeg hauv Africa.

Luvtawlees Tej Lus Qhia Lub Ntsiab

Peb tej pawgntseeg qhia hais tias tibneeg ua tsis tau kom lawv ncajncees rau ntawm Vajtswv xubntiag los ntawm lawv lub zog, lawv tej nujnqis, losis lawv tes haujlwm. Tibneeg raug suav ua neeg ncajncees dawb dawb vim Khetos, los ntawm kev ntseeg, thaum lawv ntseeg hais tias Vajtswv txais yuav lawv thiab lawv tej kev txhaum raug zam vim Khetos. Los ntawm Nws txojkev tuag, Khetos them peb tej kev txhaum tag lawm. Vajtswv suav txojkev ntseeg no ua kev ncajncees rau ntawm Nws xubntiag.

Loos 3 thiab 4; Cov Lus Lees Kev Ntseeg Ovxanpawm, Nqe IV

Luvtawlees lub ntsiab tseemceeb qhia hais tias tibneeg dim los ntawm txiaj ntsim xwb dhau ntawm kev ntseeg xwb, thiab tuav Vajtswv Txojlus Dawbhuv ua tus muaj hwjchim siab tshajplaws rau cov ntseeg tej lus qhia thiab tej kevcoj. Luvtawlees tej lus qhia lub taw raug muab xaus rau hauv “Peb Lo Lus Sola,” uas yog cov lus Latin txhais hais tias “xwb”:

• Txiaj Ntsim Xwb – Sola Gratia. Txoj kev cawmdim yog ib yam khoomplig uas Vajtswv pub dawb. Tibneeg yuav tsis tau los ntawm nws lub zog, nws tes haujlwm zoo, losis tej kevcai ntseeg xws li tej ntawv zam txim.
• Kev Ntseeg Xwb – Sola Fide. Vajtswv txiaj ntsim txais tau los ntawm kev ntseeg Yexus Khetos xwb, tsis yog los ntawm tus kheej tes haujlwm losis nws lub neej zoo. Kev Ncajncees Los Ntawm Kev Ntseeg: Cov Luvtawlees ntseeg hais tias tibneeg dim tagnrho los ntawm Vajtswv txiaj ntsim dhau ntawm kev ntseeg Yexus Khetos, tsis yog los ntawm lawv tes haujlwm zoo losis lawv tej nujnqis.
• Vajtswv Txojlus Xwb – Sola Scriptura. Phau Vajtswv Txojlus yog Vajtswv Txojlus uas Vajtswv tshoov thiab uas muaj hwjchim. Nws yog tib txoj cai thiab tus qauv rau cov ntseeg tej lus qhia thiab lawv lub neej.

Yexus Khetos yog tib tug uas nyob nruab nrab ntawm Vajtswv thiab tibneeg, thiab txoj kev cawmdim nyob ntawm Nws tib leeg xwb. Vim txoj kev cawmdim yog Vajtswv tes haujlwm tagnrho, txhua qhov kev hwm, kev qhuas, thiab lub meej mom yog Nws tib leeg li.

Lwm Yam Kev Ntseeg Uas Tseemceeb

• Tej Kevcai Dawbhuv. Cov Luvtawlees nyobrau Africa Nruab Nrab lees paub ob yam kevcai dawbhuv tseemceeb uas Khetos tau tsa: Kev Ua Npavtivxamas Dawbhuv thiab Tus Tswv Pluahmo, uas kuj hu ua Pluahmo Dawbhuv. Nyobrau kev ua npavtivxamas, Vajtswv muab kev zamtxim rau kev txhaum thiab txojsia tshiab hauv Khetos. Nyobrau Tus Tswv Pluahmo, cov Luvtawlees lees hais tias Khetos lub cev thiab cov ntshav tiag tiag nyob “hauv, nrog, thiab hauv qab” cov movci thiab cov cawv txiv hmab, uas yog ib qho kev qhia uas luag hu ua sacramental union (Lub Ntsiab Ntawm Luvtawlees Cov Lus Ntseeg, Solid Declaration, Nqe VII, 1577).
• Txoj Cai Thiab Txoj Moo Zoo. Ib qho tseemceeb uas cov Luvtawlees siv los txhais Vajtswv Txojlus yog qhov sib txawv ntawm Txoj Cai thiab Txoj Moo Zoo. Txoj Cai qhia tibneeg tej kev txhaum thiab qhia hais tias tibneeg ua tsis tau raws li Vajtswv tus qauv, tiamsis Txoj Moo Zoo tshaj tawm txog kev zamtxim thiab txoj kev cawmdim los ntawm Khetos (Luvtaws Phau Nug Teb Loj, 1529).
• Ncajncees Thiab Neeg Txhaum (Simul Justus et Peccator). Cov Luvtawlees lees hais tias cov ntseeg yog “neeg ncajncees” thiab “neeg txhaum” ib txhij mus tas lawv lub neej hauv ntiajteb no—raug suav ua ncajncees los ntawm Khetos tes haujlwm, tiamsis tseem yeem ua txhaum mus txog thaum lawv tau lub meej mom (Cov Lus Lees Kev Ntseeg Ovxanpawm, Nqe II thiab IV).
• Vajtswv Peb Leeg. Cov Luvtawlees nyobrau Africa Nruab Nrab lees hais tias muaj tib tug Vajtswv xwb uas nyob mus ibtxhis ua peb leeg: Leej Txiv, Leej Tub, thiab Vajntsujplig Dawbhuv.

Kev Pehawm Vajtswv Thiab Tej Kevcoj

Luvtawlees txojkev ntseeg yog ib pab uas coj raws tej kevcoj kev pehawm Vajtswv uas ibtxwm muaj los tshaj lwm pab ntawm cov Protestant. Feemcoob tej kev pehawm Vajtswv muaj tej lus thov Vajtswv uas teeb tseg, kev nyeem Vajtswv Txojlus, tej nkauj qhuas Vajtswv, thiab kev txais Pluahmo Dawbhuv ib ntus zuj zus, uas ua kom peb txuas nrog cov ntseeg thaum ub los li.

Pawgntseeg Kev Loj Hlob Thiab Kev Tshaj Tawm

Kev tsim kom muaj pawgntseeg Luvtawlees hauv Africa Nruab Nrab nyob ntawm tej haujlwm uas nyob tau ntev xws li kev kawm ntawv. Qhov kev cobqhia cov xibfwb yog ib feem tseemceeb ntawm pawgntseeg hauv tebchaws txojkev loj hlob, kev vammeej, thiab kev hlob tuaj. Qhov haujlwm no lub homphiaj yog cobqhia cov xibfwb hauv tebchaws kom lawv cev thiab qhia tau Vajtswv Txojlus kom raug. Cov xibfwb uas yog neeg hauv tebchaws kuj tau txais kev cobqhia txog kev ua thawjcoj uas pab kom lawv tswj tau pawgntseeg tes haujlwm zoo. Pawgntseeg txojkev loj hlob nyob ntawm qhov puas muaj cov thawjcoj uas txawj thiab uas coj tau txoj moo zoo los haum rau lub neej hauv tebchaws.

Lutheran Church of Central Africa (LCCA) txojkev loj hlob tabtom raug txwv tomqab luag txiav qee qhov kev pab nyiaj txiag sab nraud lawm. Peb xyoo dhau los no, txojkev loj hlob tagnrho qeeb heev nyobrau txhua sab ntawm tes haujlwm.

Cov Lej Tseemceeb Ntawm Kev Loj Hlob (Nruab Nrab 3 Xyoo):

• Cov neeg laus tuaj koom: 3.22%
• Cov menyuam tuaj koom: 4.22%
• Kev ua npavtivxamas: 1.95%
• Kev lees kev ntseeg: 1.74%
• Kev cobqhia cov xibfwb: 0.77%

Txawm LCCA pawgntseeg tseem pom kev loj hlob me me nyobrau kev tuaj pehawm Vajtswv, nyobrau tej kevcai rau cov tswvcuab, thiab nyobrau kev cobqhia cov thawjcoj los, cov lej tseem qis. Qhov uas txiav kev pab nyiaj txiag ntawd ncaj qha ua rau kev nthuav dav qeeb, tshwjxeeb yog kev cobqhia cov xibfwb thiab tes haujlwm ntawm tej kevcai dawbhuv. LCCA tabtom txhawb kom cov tswvcuab hauv tebchaws sib pab ntau ntxiv kom pawgntseeg nyob tau thiab loj hlob sai dua.

Kev Kawm Thiab Kev Cobqhia

Lutheran Church of Central Africa Seminary hauv Lusaka, tebchaws Zambia, muaj los npaj cov txivneej uas xav mus ua thiab txuas ntxiv ua xibfwb hauv Lutheran Church of Central Africa (LCCA) losis hauv tej pawgntseeg uas muaj kev sib raug zoo hauv kev ntseeg tseeb nrog LCCA. Nws tsis yog tsim los ua ib lub tsev kawm txog kev ntseeg rau cov neeg uas tsuas xav kawm qee chav txog Vajtswv Txojlus xwb, losis rau cov uas xav mus ua xibfwb rau tej pawgntseeg uas tsis muaj kev sib raug zoo nrog peb LCCA (BOC Handbook, 2006). Txij thaum pib los, LCCA lub seminary tau cobqhia tau ntau tshaj rau caum tus xibfwb. Ntawm cov ntawd, muaj 37 tus xibfwb uas niajhnub no tseem ua haujlwm.

Lub Seminary siv ntau txojkev los pub sijhawm rau cov txivneej uas twb ua xibfwb hauv tej pawgntseeg uas muaj kev sib raug zoo hauv kev ntseeg tseeb kom lawv kawm tau ntxiv txog Vajtswv Txojlus thiab txog lawv tes haujlwm. Kom ua tau raws li lub homphiaj no, lub Lutheran Seminary xav ua li no:

1. Pab cov xibfwb thiab cov pawgntseeg kom nrhiav thiab npaj cov txivneej mus nkag rau lub Bible Institute thiab lub Seminary.
2. Pab cov tubkawm thiab lawv tsev neeg nrog rau cov xibfwb uas twb nyob hauv LCCA lawm kom lawv hlob tuaj hauv
   • kev paub Vajtswv Txojlus thiab lub ntiajteb uas nyob ib puag ncig lawv;
   • kev tso siab rau lawv tus kheej txojkev txawj;
   • cov ntseeg txojkev ntseeg;
   • cov ntseeg lub neej; thiab
   • kev muab siab rau ua Tus Tswv tes haujlwm.
3. Tsim ib pab ntseeg uas ua haujlwm thiab pehawm Vajtswv ua ke.
4. Muab kev cobqhia ntawm sab kev kawm ntawv thiab sab kev ua tiag uas tseemceeb rau tes haujlwm hauv peb LCCA tej pawgntseeg nrog rau LCCA Synod.
5. Tswj lub tsev kawm ntawv raws li LCCA tej lus qhia (BOC Handbook, 2006).

Lwm lub tsev cobqhia cov xibfwb kuj raug tsim tsa hauv tej tebchaws Africa xws li Malawi, Nigeria, Cameroon, Ethiopia, thiab Kenya. Cov xibfwb uas LCCA cobqhia tau ua haujlwm nyobrau ntau qhov hauv Zambia, pab tshaj Yexus Khetos txoj moo zoo raws qhov tseeb thiab kom huv. Luvtawlees tej lus qhia kuj raug muab qhia, tuav, thiab hais tseemceeb los ntawm kev kawm Vajtswv Txojlus, tej lus qhuab qhia, thiab tej chav kawm ua ntej lees kev ntseeg.

Cov Thawjcoj Hauv Tebchaws Txojkev Xav Thiab Kev Loj Hlob Uas Nyob Tau Ntev

Yog saib los ntawm cov thawjcoj uas yog neeg Africa hauv tebchaws txojkev xav, nws tseemceeb kawg kom peb saib seb cov thawjcoj hauv tebchaws, lawv tej kevcai coj, thiab kev cobqhia ib tiam rau ib tiam pab tau LCCA tej pawgntseeg loj hlob thiab txawj tuav lawv tus kheej licas.

Txij thaum raug tsim tsa los, Lutheran Church of Central Africa (LCCA) tau coj raws Vajtswv Txojlus thiab tej lus lees kev ntseeg tej qauv ntawm ib lub pawgntseeg uas hlob thiab uas yog neeg hauv tebchaws li. Qhov no tshwm los ntawm peb tug ncej tseemceeb:

1. Tuav Tus Kheej – Yug Tus Kheej

LCCA txhawb kom cov tswvcuab hauv tebchaws sib pab thiab txhawb kom lawv fij nyiaj los ntawm lawv lub siab. Tej nyiaj ib feem kaum thiab tej nyiaj fij pab txhawb cov xibfwb tes haujlwm, pawgntseeg tes haujlwm, pawgntseeg tej nqi, thiab tes haujlwm tshaj txoj moo zoo hauv tebchaws. Qee lub pawgntseeg kuj ua tej haujlwm khwv nyiaj xws li ua liaj ua teb, yug qaib, thiab ua lag luam me los txhawb cov xibfwb thiab pawgntseeg tes haujlwm. Tibsi ntawd, lub synod thiab lub seminary tseem vamkhom cov nyiaj pab sab nraud rau ntau yam haujlwm loj.

2. Tswj Tus Kheej – Kav Tus Kheej

Raws li Luvtawlees txojkev teeb tsa, LCCA tswj nws tus kheej txog kev ua thawjcoj thiab txog tej lus qhia. Nws raug coj los ntawm cov thawjcoj uas yog neeg hauv tebchaws. Cov xibfwb neeg Zambia thiab cov thawjcoj uas tsis yog xibfwb uas raug xaiv hauv lub synod los yog cov kav pawgntseeg. Tej lus qhia raug tuav kom ruaj. Txhua txhua yam kev qhia thiab kevcoj raug muab tso rau ntawm Sola Scriptura thiab Luvtawlees Cov Lus Lees Kev Ntseeg. Tej kev txiav txim txog kev qhuab ntuas, kev tsa xibfwb, thiab txojkev tshaj txoj moo zoo yog Lub Rooj Sablaj ntawm lub Synod ua tus txiav txim. LCCA teeb nws tus kheej tej homphiaj, tswj nws tej haujlwm, thiab teb rau tej yam uas tshwm sim hauv nws lub tebchaws.

3. Nyob Tau Ntev – Nthuav Tus Kheej

LCCA saib ntsoov rau kev pab tej pawgntseeg thiab kev cobqhia cov thawjcoj hauv nws tus kheej. LCCA-Z tej pawgntseeg siv cov thawjcoj thiab cov xibfwb hauv tebchaws los pab tej pawgntseeg uas twb muaj lawm thiab mus tshaj txoj moo zoo hauv Zambia. LCCA, ua haujlwm ua ke nrog OAT, kuj tau pib cobqhia cov thawjcoj hauv tej pawgntseeg me. Cov thawjcoj uas raug cobqhia lawm no tejzaum yuav los ua cov tubkawm rau lub Lutheran Bible Institute thiab lub seminary.

Lub Lutheran Theological Seminary thiab tej haujlwm cobqhia cov xibfwb tsim cov xibfwb uas yog neeg hauv tebchaws, uas pab kom tes haujlwm nyob mus tsis tu ncua. Pawgntseeg tseem nrhiav txojkev kom loj hlob ntxiv, tsis hais kom muaj neeg coob ntxiv thiab kom nws tej haujlwm ruaj khov, los ntawm nws tus kheej cov neeg thiab nws tej khoom, tibsi ntawd los kuj tseem txais kev pab los ntawm cov uas muaj kev sib raug zoo hauv kev ntseeg tseeb.

Tej Teebmeem Uas Cov Luvtawlees Ntsib Nyobrau Tiam 21

Tej teebmeem uas cov Luvtawlees ntsib yog tej teebmeem txog tej lus qhia, txog tej kevcai coj, txog kev teeb tsa, thiab txog kev ua neej thiab nyiaj txiag. Thaum Luvtawlees tej lus qhia nthuav mus rau tej chaw tshiab hauv Zambia thiab lwm lub tebchaws hauv Africa, nws ntsib tej teebmeem los ntawm tej kev qhia yuam kev uas tawm tsam Vajtswv Txojlus tej lus qhia tseeb. Tej kev qhia yuam kev no muaj xws li kev coj raws txoj cai xwb (legalism), kev tso cai rau txhua tus koom Pluahmo Dawbhuv (open communion), kev sib raug zoo nrog tej pawgntseeg uas tsis ntseeg Vajtswv Peb Leeg, kev yuav ntau tus pojniam, thiab Peetekos pab pawg (Pentecostalism).

Txawm yav tas los tau nthuav dav los, cov pawgntseeg Luvtawlees hauv Africa Nruab Nrab tseem ntsib tej teebmeem loj. Tej no muaj xws li tsis muaj tej khoom siv txaus, cov xibfwb tsis muaj nyiaj txaus, thiab qhov kev sib cav txog seb yuav txhawb cov xibfwb uas ua haujlwm puv sijhawm los yog yuav siv cov xibfwb uas kuj ua lwm txoj haujlwm sab nraud kom tau nyiaj. Lwm qhov teebmeem loj uas LCCA-Z ntsib niajhnub no yog kev nrhiav nyiaj los txhawb qhov kev cobqhia cov xibfwb. Tej pawgntseeg thiab cov thawjcoj tseem sib tham txog lwm txojkev cobqhia uas tejzaum yuav tsawg nqi dua, yuav them taus, thiab yuav nyob tau ntev dua, nrog rau txojkev pab cov txivneej uas tsis muaj peevxwm tsiv mus nyob kawm puv sijhawm.

Lus Xaus

LCCA-Z sawv ua ib tug timkhawv hais tias ib lub pawgntseeg Luvtawlees hauv Africa yeej nrhiav tau txojkev kav nws tus kheej, yug nws tus kheej, thiab nthuav nws tus kheej, tibsi ntawd los tseem tuav ruaj rau Vajtswv Txojlus thiab tej Lus Lees Kev Ntseeg. Tej teebmeem yeej muaj tiag, tiamsis tej ntawd tsis yog qhov uas txiav txim seb pawgntseeg yog dabtsi. Tej ntawd hu pawgntseeg kom muaj lub siab ncajncees tob dua, saibxyuas tej uas Vajtswv tso rau peb txawj dua, thiab tso siab rau txiaj ntsim xwb mus li thaum nws ua haujlwm rau cov neeg hauv Zambia.